Pul. Siente; si mme dive duje schinffe mme resenteva, mm’è dato li ppònia e tte ringrazio, perchè teneva ll’uosso pezzillo ncordato; mme s’è sciuòveto.
Mau. E io te donco pure li schiaffe.
Pul. Addavero?,
Mau. Addavero. É uno, è ddoje. (dandogli come sopra)
Pul. Siente…
Mau. Si te deva doje morze te resenlive… va dicenno… Ma lo bide o no lo bide ca si na carogna vestutà!… Tu lo bide ca non conchiude? Già de st’affare non ce n’è nniente, e si nce fosse, vì… tu co sta faccia, sto pparlà e sto vestito, te presentave a cchella signora, e cchella te deva mille ducate a tte!… a tte!…
Pul. Perchè nno? Non m’aveva da sposà a una che steva a ppatrone, e lo patrone se compromettette d’assicurà dinto a li mmane meje na dicinca a lo juorno che lle pagava pe mmesata?
Mau. E buò mettere mille ducate co na decinca?
Pul. Tutto denaro è.
Mau. Ma ciuccione mio nato, crisciuto, e ppasciuto! Pe tte nce vorria na figliola che s’abbusca la jornata; capisce? na persona bassa… Tu non si nnisciuno, tu haje da sta dinto a la terza classa dell’uommene.
Pul. Che nce sta cchiù dde na classa?
Mau. Sicuramente. A lo munno nce stanno ll’uommene, miez’uommene, babbasune, e ggalantuommene.