curiosità) Ne signorì, signorì? avite visto la signora?
Ale. No ancora.
Cic. Vuje pure mo site venuto?
Ale. Si: haje da sapè bell’ommo mio ca io sto mpiegato a n’amministrazione. Capisce n’amministrazione?
Cic. Volite dicere na frabbeca.
Ale. No frabbeca… addò se scrive… Cic. E a l’amministracazione non se scrive sempe? non se fravecano li llettere ncoppà a la carta? ergo è frabbeca de lettere.
Ale. Comme vuò tu; ma è na fabbrica che cchiuttosto se sfraveca che se fraveca, perchè p’avanzà no grano ncoppa a la mesata nce vònno stiente assaje; e nne vuoje n’esempio? Ecco cca: io, comme t’aggio ditto, sto mpiegato. De 18 anne trasette co nniente a lo mese, e ffacette lo noviziato pe sseje anne. Quanno arrevaje a 25 anne accommenzaje a avè la vistosa mesata de vinte carrine; mo so arrevate a trent’anne e aggio trenta carrine, perzò, secunno lo calcolo che mm’aggio fatto, quanno so de ottant’anne vedarraggio la mesata de nove diece ducate.
Cic. Che bella cosa! pe la consolazione te siente mancà la meuza.
Ale. Perzò aggio ntiso sta notizia, zi viecchio mio, e sso ccurzo.
Cic. Ma se dice che sta damma sia no vero mostro, e pecchesto tene la maschera nfaccia.
Ale. Essa po essere lo campione di tutte li ffattucchiare, abbasta che sta mporpata comme s’è dditto, simmo leste. Mme la sposo senza fa chiàcchiere.