mingria, te zompo ncuollo e tte scippo tutte li capille!
Luc. A mme!… ah! ca mo… (per avventarla)
Car. (fingendo d’aver timore) Uh bene mio! che ppaura! chesta mo mme magna…
Ros. (la dentro) Vì che pprudenzia che ttenco Donna Lucrezia, Donna Lucrè!… Ve prego de non farme sòsere.
Luc. Pe mme, o ve stato assettata, o ve state sosuta, è ttutta na cosa.
Car. (volgendosi a sua zia) Zì zì, ca chesta è gguappa, tene lo mostaccio ncrifato. (c. s.) Bene mio! che paura! che ppaura!… (dal finto tremito passa rapidaniente al riso) Ah; ah, ah! quanto sì pproprio ciuccia! ah, ah, ah! se credeva veramente che io avesse tremmato… ah, ah, ah!
Luc. Nzomma tu mo… (per inveire)
SCENA III.
Rosina e detti.
Ros. (viene dalle sue stanze dicendo) Io non ne pozzo cchiù, non porta che llasso la fatica… Tu che ttiene li cacciuttielle ncuorpo che da stammatina allucche? Tu che bonora haje co sto sbarattolo? Tu saje ca sì na pezzènte cchiù dde me? tu sì stiratrice io so ssarta, tu sì senza patre e io porzì; tu e ssoreta campate co la fatica e io co ffratemo porzì: tanta superbia addò te l’appuoje? ncoppa a sti cquatte stracce che puorte ncuollo?… E na vota, e dì vote, e fitto fitto staje minaccianno, staje parlanno
