Isso redeva cumme a nu guaglione
e diceva: — « Macché l
Vuie pazziate!... Oi mà, i’ me metto scuorno.
E poi, per qual ragione?
Cumme chille l’avessero cu mme!...»
E quann’ ascette ’a dimustrazione,
ch’ èva scasata Napule, ’o truvaie
ca s’ era stiso ’ncopp’ ’o strappuntino,
c’ ’o telaro appannato,
cu’ ’a mamma soia vicino,
e a poco a ppoco s’ era appapagnato...
Se senteva ’a Tuleto
l’eco ’e migliare ’e voce ’int’ 'a na voce:
« Viva il soldato italiano!...
Vivóo!... »
C’ ’o respiro cuieto
durmeva a scialacore,
cumme a na criatura:
riccio ’e capille, ’e spalle e ’o pietto ’a fore,
pareva na pittura.
L’ asceva, ’a sott’ ’a maglia, n’ abbetino
cu nu « cuore ’e Giesù », tutto sfrangiato
e spuorco ’e sango. ’Npietto, blu-turchino,
teneva designato
nu riesto' ’e « tatuaggio »: ll’ atu piezzo
nun ce pareva cchiù: tutto squarciato
pe’ na palla a mmitraglia... Nu ribrezzo,
na pena... e nu rispetto.
« Viva il soldato italiano!...
Vivóoo!... »
