pezzul' pezzul; farraje zoffriere la nzogna dinto a no tiano co le cepolle, e accossì farraje cocere li cocozzielli co sale, pepe, e vasinicola ntretata. Li può cocere pure co lo brodo de lo stufato; li può fa pure co lo caso e ova sbattute; li può fa pure cocere co la sauza de pommadore.
Pe 12 perzone piglia quatto rotola de fasulilli agresta, ma chilli tienneri; ne lievi li struppuni, e li fili sott'e ncoppa e li scaudi, po miete dint'a no tiano, o no terzo de nzogna, o tre mesurelle d'uoglio fino, nce farraje zoffriere na cepolla ntretata, o spicolo d'aglia, sale, e pepe, e po nce vuotarrai li fasulilli facennoli ncorporà; li può fa pure co no poco de sauza de pommadore, e si nce miette l'alici salate ntrentate senza spine zoffritte, sa com' so saporiti sà!
Chisti pure se fanno de la stessa manera.
Chisti fasuli l'aje d'accattà co tutte le scorze, pecchè li venneture spognano li fasuli sicchi, e po mmiezo a la chiazza se li mettono vicino a chilli co le scorze, e fegnenno che monnano chilli co le scorze, mballano a la prubbeca de lo puopolo, pecchè aje da sape ca chilli co le scorze costano chiù, e li fasuli sicchi a chillo tiempo sò viecchi, e costano chiù poco, mperzò t'accattarraje sempe chilli co le scorze, e pe 12 perzone nce ne vanno
