Farraje primma no bello brodo janco, ne luvarraje llo grasso, e po nce farraje cocere, no paro d'acci, no paro de pastenache, no poco de petrosino tutto ntretato, po pigliarraje lle pagnotte, o felle felle arrostute, o fatt'a pezzul fritti, li miette dinto a la zuppiera co chillo brodo ncoppa, e chell'erve.
Pe 12 perzone piglia no prommone, o curatella de' puorco co lo core, e li rugnuni, farraje ogne ncosa pezzul pezzul, e lavarraje chiù vote co l'acqua fresca, e po farraje scolà; piglia no terzo de nzogna la farraie zoffriere dint'a no tiano, o cazzarola, co tutti chilli pezzulli, e nce miettarraje purzi no mazzetiello de rosamarina, fronne de lauro, petrosino, e majurana, buono attaccato; quanno se sarrà buono zoffritto nce miettarraje la conserva de pommadore, e puparuoli duci, nce miette lo sale, e polvere de puparuoli forti, e zoffrienno zoffrienno nce mietterraje lo brodo; doppo piglia le pagnotte, le faje felle felle, l'arruste senza farle abbruscià, le miette dinto a na zoppiera, e ncoppa nce miette tutto chillo brodo co lo zoffritto.
Pe 12 perzone piglia na mesura de ciceri spugnati, li miettarraje a cocere co l'acqua, e na popatella de cennera, nce cagnarraje l'acqua, e li farraje fenì de' cocere; doppo piglia tre
