Paggena:Cucina teorico-pratica.djvu/374

Chesta paggena è stata leggiuta du' vote e mo è fernuta.

366

pe li cocere) doppo che l'hai cotte le mettarraje a solare a solare o dinto a no ruoto, o a na prattella, e pe ogne solare nce miette lo caso mmescato no filaro de fellucce de provola janca, o mozzarelle, no filaro de cervellate cotte dinto a lo stufato, e si nce miette doje porpettelle non faje male, no bello coppino de brodo de stufato, e accossi farraje pe ogne solaro, e lle farraje stufà, si po le vorrisse fa doce, dint'a lo caso nce miette lo zucchero e no poco de cannella, e pure le farraje stufà co fuoco sotto, e ncoppa.

Strangola prievete.

Piglia lo sciore, e pe 12 perzone, pigliarraje doje rotola de sciore, e no ruotolo de semmola, mpastarraje ogne ncosa co no poco de sale, e no poco de nzogna, e acqua cauda, mena bona la pasta ma che non sia tanto tosta; doppo farraje tanta maccarune, e li tagliarraje comm'a struffoli, e co doje deta li ncavarraje; quanno volle la caudara (che sia co acqua a grasso) nce li mine, e vidarraje ca quanno so cuotti se ne sagliano ncoppa all'acqua, allora ne li lieve da coppa a lo fuoco, e li meniestrarraje jenchennole de chiù de na sciorta de frommaggio, nge miette lo brodo, e li farraje stufà.

Tagliarelli e Bongole.

Pe li juorne de scammaro so buoni chisti tagliarielli; piglia doje o tre rotola de vongole ma che sieno fresche, li scaudarraje pecchè accossì s'araprano tutt quant, ne lieve le scorze, e li