Piglia na bella zizza janca, e peccerella (pecchè è chiù tennera, e se coce priesto) la lavarraje pulita pulita, e la miettarraje a bollere, attiento allo scummà, ca si nò s'annegrisce, e si pe caso mancasse lo brodo, miettece sempe acqua vollente ca si nò vene ncotenuta, e chiù non se coce. Quanno s'è cotta ne lievarraje tutta chella pelle tosta pecchè chella è ancora lo cuorio, mente hai da sapè che quanno se scorteca no piezzo de vaccina, quanno s'arriva a la zizza se taglia lo cuorio, e bicino a essa se nce resta co tutti li pili, dunc' prima de vollere, li pili s'abbrusciano vicino a lo fuoco, e lo riesto se volle, ca si ne lo levarrisse primma, a la zizza no nce restarria chiù niente, doppo che n'aje levata chella pelle tosta la faje felle felle, e la miette dinto a lo piatto co la sauza de pommadore pe coppa.
Farrai sempe la zizza volluta comm t'aggio ditto ncoppa, la fielle purzì quanno è cotta, e po la miette dinto a na cazzarola co no poco de nzogna presutto ntretato, e petrosino, sale, e pepe, farraje lo sbattuto d'ova, e caso grattato, e nce lo mbruoglie pe mmiezo, e accossì la farraje servì; si po la volisse ammollecata doppo volluta la faje felle felle, e l'accuonce dint'a no ruoto, co pane grattato, limone, e no poco de petrosino, sale, pepe, e no poco de' butirro e la farraje ngrattinà a lo furno.
