386
accuonce dint'a lo ruoto co caso grattato pe mmiezo, e brodo de stufato, facennole pure stufà. De chesta manera se ponno magnà pare senza stufà caude caude.
Piglia chelle belle molignanelle peccerelle, e chelle nproprio che se fann'a l'acito, ne lieve li struppuni e lle scaudarraje facennole scolà bone, bone, li nfarine, e lle frie co la nzogna, farraje na sauza acre, e doce, nce le mbruoglie, e l'accuonce dint'a lo piatto.
Piglia li cocozzielli li fiellarraje a luongo comm'a le molignane, e lli miettarraje purzì nsale, po li spriem, e li friarraje tale, e quale comm'a le molignane acconciannoli co lo caso grattato, brodo de stufato, facennoli stufà comm'a chelle.
Fella li cocozzielli pe tunno , li miette pure nsale, po li spriemm'e lli frie nfarenannoli primma, po farraje na bella sauza verd co no poco de zuccaro, e cannella, accuence a filaro, a filaro li cocozzielli dint'a no piatto co la sauza pe mmiezo, e ncoppa, e te li magnarraje friddi già.
De la stessa manera può fa purzi la cocozza fellannola, e mettennola nsale, e friennola e, nce può fa o la stessa sauza verde, o puramente na sauza acre, e doce.
