Paggena:Il mastro di forgia - Raffaele Viviani - 10 commedie.djvu/9

393

Il mastro di forgia

DONN’ANNA — Giesù, tu te retire, doppo ca t’hé fatto nu core tanto^[1], vide ca sta mugliera toia nun se fa truva’ e te lassa a n’estranea pe’ te fa’ appiccia’ nu poco ’e fuoco, e nun scatte?

ELISA — E cu chi scatta? Si chillo nun trova a nisciuno? (Pausa).

DONN’ANNA — E ’a mugliera quanno vene?!

PEPPENELLA — E chella nun venarra^[2] cchiù.

DONN’ANNA — Ce sta pure stu pericolo?

PEPPENELLA — L’ha ditto a mme: «…E stanotte, nun me retiro». (Pausa).

DONN’ANNA — E chi è stu ’nnammurato?

ELISA — Nu miezo sfelenza^[3], sicco sicco, cu nu capputtiello^[4], cu nu bavero aizato^[5]. Rrobba ca, cu nu sciuscio^[6], va ’n terra.

DONN’ANNA — E chella, cu chillo marito, faticatore^[7], chino^[8] ’e salute…

La voce di Don Peppe — Nanni’…

DONN’ANNA (ad Elisa) — Pateto^[9] s’è ritirato. (Verso la porta) Gué, gué, sto ccà, dinto a ddu Don Giuvanne.

DON PEPPE (entrando) — È permesso? Don Giuvanne… (Si sberretta. È un vecchio operaio, ancora tutto nero di fatica).

DONN’ANNA — Trase, nun ce sta nisciuno.

DON PEPPE (alla moglie ed alla figlia) — E che ffacite, lloco^[10]?

DONN’ANNA — Niente, stammo parlanno cu Peppenella ’e sta bon’accunto^[11] ’e Donna Carmela!

DON PEPPE (contrariato) — Jatevenne dint’’a ddu vuie^[12]! Ascite dinto^[13]! So’ fatte chiste, ca nun ce riguardano.

ELISA (giustificandosi) — Ccà se parlava pe’ dicere…

DON PEPPE — ’O pizzo vuosto^[14]! (Pausa) Ogge o dimane succede nu guaio, pecché succedarrà, pecché ce avimm’a truva’ ’mmiezo?

DONN’ANNA (al marito) — Donna Carmela ha chiammato a Peppenella pe’ lle fa’ appiccia’ ’o ffuoco, e pe’ lle fa’ mettere ’a tiana.

DON PEPPE (serio) — E essa steva cu chillo… L’aggio vista.

DONN’ANNA — Sì?

DON PEPPE — Essa m’ha salutato pure. (Pausa).

1. ca t’hé fatto nu core tanto: che hai lavorato tanto.
2. venarrà: verrà.
3. sfelenza: scalzacane.
4. capputtiello: cappotto misero.
5. aizato: alzato.
6. sciuscio: soffio.
7. faticatore: (buon) lavoratore.
8. chino: pieno.
9. Pateto: tuo padre.
10. lloco: là.
11. bon’accunto: buona cliente.
12. Jatevenne dint’’a ddu vuie!: andate a casa vostra!
13. Ascite dinto!: entrate in casa vostra!
14. ’O pizzo vuosto!: Al posto vostro!