9.
A lo vuto ’mmarditto, e a la tremenna
Machena de Minerva s’affollaro,
Dicenno, potta d’hoje, che cosa orrenna!
Bello vuto! appennimmolo a n’autaro;
E Tremertio volea, che la facenna
Trasesse a Troja, e l’havea fuorze a caro,
Pe nce tradire chillo cane boja,
O la sciorte accossì volea de Troja.
10.
Marramaù, disse Capio, e chiù de ciento
Sapie comm’isso; affè non me ’nce cuoglie.
Derrupatelo à mare sto presiento;
Brusciatelo, si nò, piezze de ’nnoglie!
Spertosammo sta panza, e juramiento
Ve faccio mò, ca scoprarrimo ’mbroglie.
Chi disse si, chi nò lo popolazzo;
E chi disse de nò fù no gran pazzo.
11.
Corre Laconte da lo gran Castiello
Da catervia de gente accompagnato;
E, rutto a sbottorune lo rotiello,
Auzaje la voce comme speretato:
Eilà, che havite perzo lo cerviello?
Che Diaschece ’n capo v’è sautato?
Sò frabutte li Griece, sò ’mbrogliune.
Mostrano coppe, e danno pò vastune.
12.
Site ’mpazzute nè? che ve credite?
Che li Griece se siano allontanate?
Duono de Griece? gnaffe! e non sapite
Quante trappole Aulisse hà congegnate?
O' ccà dintro ’nce sò (lo vedarrite)
Chiù de treciento Griece ammasonate,
O pe accoppare Troja a quacche assauto
Hanno fatto sto chilleto tant’auto.
