137.
E vedenno ca jeano a vele chiene
Le galere sparmate à paro, a paro,
Devacato lo puorto, e a chelle arene
Non c’essere na varca, o marenaro,
Arrasso sia, che zirria, che le vene!
E le schiaffaie chiù de no centenaro
De punia ’n pietto, e chelle belle trezze
Se stracciaje, scarpesaje comme monnezze.
138.
E disse: se ne và, benaggia Giove!
E io perdo lo frutto, e capetale.
Cossì a lo regno mio ste belle prove
No frostiero farrà senza pedale?
Potta d’hoje, e sta gente non se move?
Eilà cacciate da lo Tarcenale
Le Galere: a le shiamme, a la vennetta,
A le bele, a li rimme; e che s’aspetta?
139.
Che dico? dove stò? quale pazzia?
Uh sfortonata te, mò te resiente?
Mostrare se dovea sta vezzarria
Quanno faciste Rè ss’ommo da niente.
Chesta è la fede data ’n casa mia?
Cheste sò le prommesse, e juramiente?
Se porta ’n compagnia li Dei Penate:
Ah cuollo tuorto! e sà ste canetate?
140.
Lo patre viecchio pe piatà sarvaje
Co le soe spalle: acciso chi lo crede!
Perche sso perro io non taccariaje?
Ne a mare jettaje ss’ommo senza fede?
Perche tutte li suoje non sfecataje?
E lo figlio porzì, lo grann’arede
De lo regno de Talia? e a no commito
Dare nce lo dovea cuotto a no spito.
