Chesta paggena è stata leggiuta.
539
Dell’AneideCanto v.
157.
Dapò correa lo puorto, e lo tiraje
- Dintro de na galera: e sbagottuta
- Ogn’una se vedea, mà l’anemaje
- N’autra vecchia scalorcia, mà saccinta;
- E fù maddamma Perchia, che allattaje
- Tanta figlie de Priamo, e la verruta,
- Figlie, figlie dicea, che ve credite
- Che sia Bertola chessa che vedite?
158.
Non è Bertola nò ssa vecchiarella:
- E na Dea, è na Dea pe l’arma mia:
- Si bè la sacce stà sbeffecchiatella,
- Me ne dà signo, e io ne jurarria:
- Le luce ogn’huocchio comme lucernella,
- Che shiatillo addoruso! che armonia!
- Che docezza de voce! che conzierto
- Da capo ’nfi a lo pede! e Dea pe cierto.
159.
Bertola meza cionca, e scioffellata
- L’haggio lassata la scuressa a lietto;
- E perchè stava troppo accatarrata,
- L’haggio fatta n’ontata pe lo pietto.
- E quanto se dolea la sfortonata,
- E comme stava chiena de despietto,
- Ca pe l’arma d’Anchiso ’n communanza
- No signo non facea d’amorosanza!
160.
Mà già varcoliavano li core
- ’Ntrà lo sì, ntrà lo nò de tutte chelle.
- Con’huocchio stuorto, e chino de forore
- Ogn’una tenea mente a li vascielle.
- E da na parte le tirava ammore
- A non lassare sti paise belle:
- Da n’autra parte le parea peccato
- Lassare Talia contra de lo Fato.CumT4