25.
Cossì chella le furie sbaporanno,
Co na voce de truono te stordeva:
E ste doglie de capo sprubecanno,
Cose chiare co ascure responneva;
Comme le jeva Apollene allascanno
La mordacchia a la vocca, o la stregneva;
O comme allummenaje la mente a chella
O co la ’ntorcia, o co la cannelella.
26.
Scomputo ch’happe de tataniare,
E le passaje la furia, e stette zitto,
Anea le repigliaje, non te penzare
Che me sia nuovo, quanto mò m’hai ditto:
Ca quanto t’haggio ’ntiso annevinare,
Tutto lo tengo a la mammoria scritto
Uh da quant’anne! e già m’è ’nfracetato
’N capo, quanto t’ha Febbo ’nfrocecato.
27.
Sulo vorria (giache da sto grottone,
Comme pe famma prubeca haggio ’ntiso,
A lo Regno se scenne de Prutone)
Vedere, Vava mia, lo Patre Anchiso:
Dammella, bene mio, sta sfatione,
Dimme de sì, mà co na facce à riso.
Apre ssa porta, e mostrane la via,
E tu viene co mico ’n compagnia.
28.
’Ntrà le shiamme, e le spate io lo sarvaje,
E ’n cuollo io lo portaje pe amorosanza;
E da vocca a la morte io le scippaje,
E nc’haggio puosto a riseco la panza.
Pe mare, e terra pò m’accompagnaje,
E venceva li guaje co la speranza,
Si bè a la sonnareglia se trovava
Dell’anne, e già la forza le mancava.
