73.
Scopa de vrusco pe le ragnatele
Pare che sia la varva ’mpeccecata.
L’huocchie hà de fuoco, comme doi cannele,
E ’n cuollo hà na mappina arravogliata.
Isso passa li muorte a rimme, e vele,
Co na varca arreggiuta, e carolata.
Isso tene la guardia de sto puosto:
E’ viecchio musso, mà stà vispo, e tuosto.
74.
Lloco vide li muorte a miliune
Correre a chelle ripe sgratiate,
Peccerille co giuvane, e vecchiune,
Vedole, Zitelluccie, e Maretate,
L’Aroje valiente co li vozzacchiune
Se ne stavano llà tutte ’mmescate;
E da Caronte aspettano lo passo,
E fanno, uh che greciglio! uh che fracasso!
75.
Tanta frunne non cadono a l’Autunno
Nè tanta aucielle passano volanno
A quacch’autro paese de lo munno,
Dove è chiù caudo, quanno è friddo l’anno.
Tutte chille; che arrivano a sto funno,
Spantecate de voglia se ne stanno
De passare chell’acqua d’Acaronte,
E a braccia stese pregano Caronte.
76.
Mà piglia lo marvaso o chiste, o chille,
Comme le vene sboria, e l’autre caccia
A cauce, e sbottorune a mille a mille,
Eco no palo ’n mano l’ammenaccia.
Stoppafatto stà Anea pe tanta strille,
E pe tanto concurzo, e co la faccia
Spantata disse à la Sacerdotessa,
Mettimmo mano ccà? che cosa è chessa?
