125.
E tanno Alena varie Dammecelle
Portaje de la cetà p’ogne cantone
Fegnenno feste a Bacco, e ’n miezo a chelle
Alummato tenea no gran ’ntorcione.
Essa co chillo fuoco a li vascielle
Dava lo signo, e da no torrione
Le chiammava accossì: ca li sordate
Tutte steano addormute, o ’mbriacate.
126.
Stracqquo pe lo gran suonno, e pe li guaje,
A lietto io me jettaje miezo vestuto:
E tale suonno chino m’afferraje,
Che pareva chiù muorto, che addormuto:
Tanno la bona femmena levaje
Tutte l’arme de casa, che pe ajuto
Acciaffare io potea, ’nfì a no pognale,
Ch’io tenea sotta de lo capezzale.
127.
A Mennelao dapò primmo marito
Spaparanza la porta de la casa,
Penzanno co sto duono saporito,
De le tornare ’n gratia la marvasa
E che de lo negotio de Cornito
Cossì restasse ogne mammoria rasa.
Che parlo chiù? de furia m’assautaro,
E piezze piezze me taccariaro.
128.
Aulisse era co chisse frabuttune,
E l’anemava a sta gran canetate.
De la stessa moneta ssi guittune,
Si ve cerco lo justo, o Dei, pagate.
Mà tu comme sì sciso a sti vallune,
Che ancora hai vita, e bona sanetate?
Fuorze hai curzo tempesta? o te nce manna
L’ordene de li Dei, che lo commanna?
