133.
Fregetonte co l’acqua soa vollente
’Ntuorno ’ntuorno le scorre; e la roina,
E fracasso no miglio se ne sente;
Ca gran piezze de munte se strascina.
No portone nce stà tanto lucente,
Che ceca l’huocchie a chi se l’abbecina,
Perche isso, e le colonne, ch’have ’nnante,
Sò tutte de no piezzo de diamante.
134.
Hommo non c’è de forza accossì granne,
Manco nc’è tra li Dei chi sto portone
Rompere pozza maje, si bè mill’anne
Nce fatecasse a botte d’acettone.
S’auza all’aria duciento, e trenta canne
Na gran torre de fierro, e Tezefone,
Che a colore de sango hà la gonnella,
Juorno, e notte nce fà la sentenella.
135.
Ccà se senteano all’aria rebommare
Mazzate, e strille; e fanno gran remmore
Fierre, e catene. S’happe a speretare
Anea, e s’agghiajaje pe lo terrore.
Se ferma, e ’nnante non potea passare,
Ca gnevolire se sentea lo core.
E disse a la Sebilla: oimmè che sento?
Io me moro de jajo, e de spaviento!
136.
Che tormiente, e che chiasso accossì strano
De mazzate, de strille, e de catene?
La Sebilla respose: Aroje Trojano,
Maje nce trase a sto luoco ommo da bene.
Mà quanno Ecate a me la chiave ’n mano
Me consegnaje d’Avierno, essa le pene
Me mostraje de sto regno doloruso,
E me portaje vedenno ogne pertuso.
