165.
O Patre, l’ombra toa, che spisso spisso,
Anea respose, me s’è appresentata,
M’hà commannato a scennere a st’Abisso.
A Cumma stà tutta la nostra armata.
Damme n’abbraccio sù, ca senza chisso
Non se sente chest’arma conzolata:
Mentre cossì sbafava co la voce,
Le scenneva lo chianto doce, doce.
166.
Tre vote l’abbracciaje pe le ’mpizzare
No vaso tunno all’una, e all’autra faccia.
Mà lo scurisso se vedea scappare
L’ombra comme no viento da le braccia
Comme chi ’n suonno penza d’abbracciare
Chi le và ’n fantasia, mà l’aria abbraccia;
E chiù d’uno accossì, che s’è scetato,
Co no parmo de naso s’è trovato.
167.
’Nntrà tanto Anea pe miezo a le vallate
Vede no vuosco, e ne sentea lo sfruscio,
Che pe miezo a chill’arvole ’nferrate
Facea no ventariello co lo sciuscio:
E ’ntrà ripe da shiure arragamate
Scorrea lo shiummo Lete muscio, muscio:
E ’ntuorno all’acqua frescolella, e chiara
Le gente nce correano a centenara.
168.
Comme a lo Maggio l’ape ’nnustriose
Volano a sciame, a sciame, e se ne vanno
Dove trovare ponno erve addorose,
E fanno ’ntrà li shiure scurrebanno:
Chi se ferma a li giglie, e chi a le rose,
Chi zuca ccà, chi llà vervesianno:
Spantato disse Anea, che cosa è chessa?
Che gente corre llà tanto de pressa?
