cioccolatta, offrendone due parti alle due donne) Tenite.
Assunta (mangiando) — Cummà, grazie. È buono! Zi’ Rò, nu pezzullo (Le va vicino).
Rosa — Lasseme sta pure tu!…
Assunta (Facendo controscena con Carolina e Teresa) — Eh! nce vo’ pacienza. — Sempe accussì, da quanno accumminciaie ’a causa… sempe!
Carulina — Chi lle pò dicere niente! Chi lle pò dà tuorto! So’ ccose ca fanno fa ’e capille lanche primma ddo tiempo!
Rosa (raccoglie l’ultima frase) — E ll’aggio fatte!… Me s’o fatta ttutta janca! E darria ati vint’anne d”a vita mia pe mmo vedè ancora vivo vicino. Era ’nzisto?… S’accunciava! Tanta gente s’è accunciata! Io ll’aggio perdunato sempe! M’era figlio… E sulo chi è mamma mme pò cumpatì…
Assunta — Ma mò zi’ Ro’, s’ha dda fà ’a vuluntà ’e Dio!
Rosa — E ll’aggio fatta! Era destino suio… Ma io nun l’aggio maie maleditto… Maie! ’A maledizione mia l’avarria fatto male… (come risovvenendosi). Che morta nfama c’ha fatto!
Teresa — Penzate a isso ca torna doppo sette mise ’e carcere… a isso che ll’era pate e che… Si l’avisseve visto, comme s’è sciupato… s’è fatto che non se canosce cchiù!… Nun avite vuluto venì maie ’a causa… Si no avarrisseve avuto pietà… V’avesse fatto pietà!
Rosa — Nun aggio avuto ’o curaggio.
Teresa — Chillo Zi’ Vicienzo, v’ha vuluto sempe bene! Ve ne vò tanto!… ’O guaglione v’aveva minacciato, e isso nun nce vedette cchiù…
Carulina — E pò’ d’’o pruciesso è risultato! Comme ha parlato bello l’avvocato! E ’e giurate l’hanno assoluto.
Assunta — E nun arrivano ancora!… (Va all’uscio come prima.) Lasseme vedè!… (Guarda fuori attentamente). Me pare… Si!… So’ lloro!… È zi’ Vicienzo… Priesto
