ribbrezzo… nun è paura. Nun saccio ched’è… Ma nce sta ’na cosa fra nuie ca ce tene luntano… ca m’ha fatto tremmà e nun m’ha fatto venì a pigliarte… (Con spavento) È isso!… sarrà isso!
Vicienzo (con voce soffocata, tremante) — Isso! Haie ragione! È isso!
Rosa (guarda sempre innanzi a sè, senza voltarsi verso di lui) — Tu staie ccà.. addo’ isso cadette… E ssi’ passato ncoppa a chelli riggiole, addò ’o sango suio facette ’na macchia grossa… (Con spavento e raccapriccio)…e ssi’ passato ’ncuollo a isso, ncopp’’a chella macchia!…’O sango suio!.. (Inorridita s’alza, si volge e guarda verse la porta) Llà.. llà’..E t’aggio visto trasì.. e io… (Guarda Vicienzo — Lo sguardo di lei si posa sulla destra di lui. Inorridisce.) Chella mano!… Annascunne chella mano!.. ’Ncoppa ’a essa nce sta tanto sango! Sì trasuto, aggio guardato… Chella macchia se faceva cchiù grossa… e ’a mano toia s’era fatta rossa!… Annascunne chella mano! Annascunne chella mano!.. Tu staie ccà, e figliemo cade n’ata vota dint e bracce meie… ’o sento cadè… ’o mantengo… s’abbandona… È ’o sango suio mme nfonne ’e mmane… E isso me chiamma: Mamma mia!… Mamma mia!… aiuto!… ’O vi llà… llà!… (Guarda con occhi da folle il posto, l’addita) Llà ’nterra!.. Quantu sango!… È ’o suio!… è ’o suio!… Figlio mio!… figlio mio!… (Nella voce ha tutta la disperazione materna, nella invocazioni al figlio ucciso).
Vicienzo — Tu m’accide! Tu m’accide!
Rosa! (disperata) Nun c’è rimmedio!… Nun c’è rimmedio!
Vicienzo — ’O vularria truvà stu remmedio, e nun pozzo!… E nun se pò truvà… Fuie ’na disgrazia! Isso t’aveva afferrata pe nganna… E io ce ll’aveva ditto:— Sta femmena, mammeta, è stata ’a gioia… è ’a gioa d’’a vita mia… io ll’aggio adurata ’e penziere… Guai a chi ’a tocca… Guaie! E chillo aveva già aizato n’ata vota a mano… e io chillo vraccio nce ll’aveva fatto cadè, quase spezzannolo!… E io ’o vuleva bene… e tu te
