sacrificave… T’aveva luvato tutto isso!… E io ’o vvedeva… e nun diceva niente!… Te vuleva cchiù bene… e avarria vasato a terra addò mettive e piede… Ll’aveva ditto: — vattenne!… partetenne!… Nun le mancà ’e rispetto!… E isso t’aveva fatto vennere fino ’aniello e quanno spusaiemo… E vuleva ’a te chillo lazzetiello d’oro, ca tu ’o tenive chiù caro d’a vita… chilllu lazzetiello ca t’arricurdava ’o juorno ca isso era nato… Pure chillo vuleva! E tu chiagnive… e lle dicive: — Giuvannì… no… Giuvannì… no!.. — E isso amminacciava… E io lle dicette: — Vattenne!… Iesce!… Lassa sta a mammeta! — Allora… isso stennette ’e mmane pe’ to luvà pe fforza… E ’o lazzetto nun veneva… E isso stregneva… Chelli mmane te stèveno affucanno… Allora me menaie pe te difennere. Isso me dette ncuollo. Nun nce vedette cchiù… Sparaie… sparaie… (È convulso).
Rosa (con un grido di disperazione) — Ah!… Nce li avesse dato chillo lazzetto!
Vicienzo — E chella macchia ’e sanghe ca tu vide ccà… (Mostra la mano)… io ma veco pe’ ’ncuollo… pe’ tutta ’a persona… e mma voglio levà… e nun pozzo… e nun riesco… E lle cerco perdono!… Perdono ca l’aggio acciso!… Nun vulevo!… Nun vulevo!… (Dal fondo sono entrate, dall uscio di destra Nunziatina e Assunta. Ascoltano silenziosamente, commosse.)
Rosa — Nun putive vulè!…
Vicienzo — Accussì nun pozzo campà cchiù… Haie raggione!… Nun mme può perdunà!…
Rosa — (piange, singulta dolorosamente, ma non s’avvicina a lui).
Vicienzo — Nun nce sta pietà pe‘ mme! Nun nce sta pietà… (S’alza) Me ne vaco… Tutto nce sparte… Isso nce sparte!… Nce sparte, pe’ sempe!… Me ne vaco… (va verso l’uscio, disperatamente, deciso ad andarsene — Ma un ultimo filo di speranza lo trattiene. Si arresta nell’istante di varcare la soglia.)
