Paggena:La Divina Commedia Napoletano Domenico Jaccarino-Nfierno.djvu/119

— 121 —

CANTO VINTISETTÈSEMO ARGOMIENTO

Dante dinto a sto canto secoteja a pparlà de la stessa pena, e svotatose a n'autra sciamma trova lo Conte Guido da Montefierto. Chisto lesto addimmanna a lo Poeta notizia de li Romagnuole, e ppò lle conta tutte li peccate suoje pe li quale è stato connannato a chella brutta pena.

Deritta stea la sciamma e assaje cojeta
Pe non ddì cchiù, e da nuje se nne jeva
Co lo permesso de lo sio Poeta;
Quanto n'autra arreto lle veneva,
De nuje ognuno ll'uocchie nce avotaje
Pe no suono che ffora llà n'asceva.
Comm' a ttoro d'abbrunzo che strellaje
Co lo chianto de chillo, e fuje deritto,
Che primma co a limma temperaje,
Strellava co la voce de l'affritto,
Tanto che simbè fosse ramme fuso,
Pure pareva addollorato e fritto,
Ccossì pe non avè via, nè pertuso
Da o pprencipio de lo ffuoco, tanno
Parlava comme sciamma tene ll'uso.
Ma appena llà jettero viaggianno
Ncopp'a la ponta dannole no sguizzo,
Comm'a lo ffuoco jevano parlanno,
Sentettemo: Io mo a tte ccà mm'adderizzo
La voce che parlava mo Lommardo,
Dicenno: Va, ca io mo cchiù non te stizzo;
Ca so fuorze arrivato quase tardo,
Ma voglio che co mmico staje a parlare,
E vide che pe ffàrelo io già ardo.
Si tu ccà dinto stato sì a arrivare
Cadenno ccà da chella docia terra
Latina, addò stette io sempe a peccare,

16