Paggena:La Divina Commedia Napoletano Domenico Jaccarino-Nfierno.djvu/123

— 125 —

CANTO VINTOTTÈSEMO ARGOMIENTO

Arrivate li Poete a la nona borgia trovano che nce songo casticate chille che a mmunno lloro ànno dato scànnale, contro a l'aresie e a la religione, e tteneno spartute li cuorpe lloro. Nfra de chiste trovano a Mametto e a ciert'autre tutte sformate e curiuse.

Chi potarrìa maje co le pparole
De lo sango e le cchiaje mo ccà parlare
Che vedette io, si contà se pote?
Ogne llengua starriamo a 'ntartagliare,
Pe la parlata nosta e pe la mente,
Ca niente potarriano ancappare.
Si s'aunasse ccà tutta la gente
Che già ncopp'a la fortunata terra
De Puglia de lo sango fuje fetente.
Pe li Romane, e pe la longa guerra
Che tante anielle fujeno pigliate
Comme Livio scrive, e cchiù se mperra,
Co chella che sentette de mazzate
Pe contrastare a Lobberto Guiscardo,
E l'autra ch'avè ll'ossa già atterrate
A Ceperano, addove fuje bosciardo
Ogne Pugliese, e llà da Tagliacuozzo
Addò senz'arme nce vincette Alardo;
E si s'ammostano ossa rotte a mmuozzo,
Non se potria contà comm'era rotta
E sporca assaje sta borgia 'nchillo cuozzo.
Già vedeva accossì na meza-votta,
E vedette uno accossì spertosato
Rutto da nfaccia e mpietto 'nfino a ssotta.
Da fora le stentine avea sto sgrato,
La coratella, e ppò lo ventriciello
Addò lo strunzo stace arreparato.