Paggena:La Divina Commedia Napoletano Domenico Jaccarino-Nfierno.djvu/204

— 50 —

⁠

Comm'a toro feruto sente male
Chiù non sapenno sta co ppiede tuoste
Zompa da ccà e da llà, llà tale e quale
Facea lo Minotauro a li mpuoste,
E chillo me dicette: Fatte arrasso,
Mentre sta nfuria è buono che te scuoste.
Lo llario accossì pigliajemo a passo,
E da sotto a li piede justo tanno
Le pprete nce faceano no sconquasso.
Lo Masto dice a mme: Tu staje penzanno
A st'arroina ch'e' guardata a bista
Da chella bestia che se se sta arraggianno.
Sacce che n'autra vota l'aggio vista,
E quanno io po ccà abbascio nce scennette,
Non era chesta roccia tanto trista
Ma certo, poco primma succedette,
Ca sta terra cadette a lo sprofunno,
Quanno lo Redentore se movette.
Da tutte parte ccà tremmaje lo munno,
E io penzaje ch l'aria co lo ffuoco,
E l'acqua e l'autre ccose de sto tunno
Se fossero nfoscate a ppoco a ppoco,
Tanto da fà sta roccia ccà cadere,
Che stette pò accossì mmiezo a sto luoco.
Guarda cchiù abbascio, e staje tu llà a vedere
Gente che dinto a ssango sta vollenno,
Ca de sango accedette pe piacere.
O arraggia! o furia, che me vaje smovenno
E a la vita corta tu nce stizze,
E a l'aterna nce faje mo sta soffrenno!
Io vedette na fossa nfra sti pizze
Che ccà tutto lo chiano nce s'abbraccia,
E li capille ncapo tu t'arrizze.
E correvano llà co tosta faccia
Centaure co ssaete proprio assaje,
Comme li cacciature vanno a caccia.
Vedenno a nuje llà ognuno se fermaje,
E tre de lloro ascettero 'mpriezza,
E l'arco e l'asta ognuno se pigliaje.
Uno strellaje: De vierme fa na trezza
Chi scenne ccà, e vuje a che venite?
Priesto, rispunne, si nò tiro la frezza.