Paggena:La Divina Commedia Napoletano Domenico Jaccarino-Nfierno.djvu/76

— 78 —

Ch'io pe chell'aria vedde venì tanno
Na fiura da ncoppa, e io me nce pascio,
Maravigliosa a chi la va guardanno,
Conforme torna chillo che va abbascio
A llevà ll'àncora a mmare e lesto scappa
Si de scuoglie àve attuorno no gran fascio,
Pò vene a galla e nfaccia nce s'acchiappa.

CANTO DICIASETTESEMO ARGOMIENTO

Lo Poeta dice comm'è fatta la forma de Gerione. Pò secoteja che arrivate ncopp'a la riva che sparte lo settemo circolo da l'ottavo, e chiammato llà Gerione, Vegileo se rummane co isso, e pò sequeta a cammenà cchiù nnanze p'avè notizie de la terza manera de li violiente, ciovè de chille che ausano la violenza contro a ll'arte. A la fine pò tornannosenne addò Vergileo scenneno pe ll'aria dinto a l'ottavo circolo da ncopp'a Gerione.

Chestè la fera che co chesta coda
Passa li munte e rompe mure e arme,
Lo munno appuzza, e non se sta maje soda.
Lo Duca a mme accossì stette a parlarme,
E chella llà vicino isso chiammaje
Che s'azzeccasse nfaccia a chilli marme.
E chella porca lesto s'accostaje
E la capo cacciaje co mmiezo busto,
E la coda accossì lesto ngrifaje.
La faccia era na faccia d'ommo justo,
Tanto benegna avea fora la pelle,
E de serpente tutto l'autro fusto.
Ed erano pelose le ddoje scelle,
E lo pietto e le spalle e le ccostate
Pittate avea de nòdeche e rrotelle.
Co colore cchiù belle maje pittate
Li Tàrtare non ficero li panne,
Nè tele Aragne tanto assaje stimate.