Paggena:La Divina Commedia Napoletano Domenico Jaccarino-Nfierno.djvu/80

— 82 —

Comme farcone vola pe piacere
E senza vedè si nc'è n'auciello,
Fa ngannare porzì lo farconiere.
Scenne stanco e se move a sto rociello
Pe cciento rote, e abbascio da birbone
Ammenaccia lo Masto, poveriello!
Cossì nce mise nfunno a Gerione
A piede de la rocca auta e stagnata,
E scarrecate le noste perzone
Sparette comm'a n'anema dannata.

CANTO DICEDOTTESEMO ARGOMIENTO

Lo Poeta parla de lo sito e de la forma de l'ottavo chirchio, spartennone lo funno a diece borge, dinto a le qquale se carfettano diece deverze specie de peccature. E dinto a chisto Canto ne parla solamente de duje: l'una è de chille che ànno 'ngannata quarche femmena o pe lloro stesse o pe l'autre, e lli mette dinto a la primma borgia addò songo sferzate da li diavole pe scontà la pena lloro; l'autra è de chille che fanno fauze alliccasalemme a la ggente, e songo condannate a sta pe sempe dinto a la mmerda fetente (pe la faccia lloro!)

Mala borgia è no luoco de lo Nfierno
Tutto de preta e a ffierro colorato
Comm' a lo chirchio attuorno co lo pierno.
Justo mmiezo a sto campo mmalorato
Nce sta no puzzo assaje lario e profunno,
Ch'a luoco sujo sarrà meglio guardato.
E chillo muro che rummane è tunno
Ntra lu puzzo e la ripa tosta e scura,
E diece valle tene justo nfunno.
A la quale pe guardia de le mmura
Stanno cchiù ffuosse attuorno a li castielle
Azzò la parte stace cchiù sicura,
Accossì nfra de chiste e nfra de chelle
Da chilli puoste lloro qua fortezze
A la ripa nce stanno ponticielle,