Paggena:La Divina Commedia Napoletano Domenico Jaccarino-Nfierno.djvu/84

— 86 —

Vattennose lo fronte isso dicette:
Ccà abbascio sto p'avè la gente 'nfrisco
Mettuta, co le cchiacchiare e mmottette.
Lo Duca disse: a vedè tutto a ssisco
Fa cacciarle cchiù nnante chella faccia,
Azzò dinto guardà puoje frisco frisco.
Chi è chella scapellata gran porcaccia
Che se scippa co ll'ogne assaje mmerdose,
E se scommoglia, e a ll'erta pò s'affaccia?
È Zaida la puttana che rispose
A Ninno sujo dicenno: io aggio grazie
Granne da te? anze maravigliose.
Basta, ch'avite mo le bbiste sazie.

CANTO DECENNOVESEMO ARGOMIENTO

Arrivano li Poete a la terza borgia addò li Simoniace soffreno la pena d'essere nfeccate dinto a cierte ppertose co la capo sotta, autro non comparenno de lloro che le ssole gamme, e tenenno sciamme de fuoco appicciate sotto a li piede. A lo funno de la borgia Dante trova a lo Papa Nicola Terzo, e tanto d'isso che d'autre Pape mette nterra tutto lo mmale ch'ànno fatto a la Chiesia. Pò pe la stessa via da dò era sciso Dante è portato da Vergileo da la borgia ncopp'a l'arco, che corrisponne a lo funno de la quarta borgia.

O Simon Mago, e vuje che ghiate appriesso,
Che le ccose de Dio, che de bontate
Anno a esse le spose, e buje pecchesso
P'oro e argiento addavero avviziate;
Commene ca pe buje sona la tromma,
Pecchè a la terza borgia mo già state.
A sto sepurcro già lo Masto assomma
E io pure a lo scuoglio 'nchella parte
Che ghiusto ncoppa a mmiezo fuosso 'nghiomma.
Oh grannezza de Dio, e quant'è ll'arte
Che ammuste e 'n Cielo e nterra e a mmalo munno,
E quanno justa la vertù scomparte!