’O cupista
Copia ogne cosa, musica, pruciesse,
carte d’ ’o Municipio, chello c’ave;
’o lusingano ’e chiacchiere e prumesse
e ’o fanno vedè ’o Cielo sotto ’e trave.
Corre a dderitta e a manca, va sbattenno,
cunzuma ’e scarpe e nun ricava niente,
torna ’a casa accussì quase redenno,
pecchè se scorda ’e ’na iurnata e stiente.
Ma se scorda p’ ’a figlia ca ll’aspetta,
’a figlia ’a quinnice anne ch’è nu sciore,
ca, senza mamma, a niente cchiù da retta
e nun ne vo sapè ’e parlà d’ammore.
L’ammore suio sempe ’o padre è stato,
anze mo ’o vo cchiù bene int’ ’a strettezza
e quanno ’o vede stanco e affaticato
tutto l’abbraccia e tutto l’accarezza.
L’affligge sulo ’nu penziero brutto
’e quacche cosa ’a ’nu mumento a n’ato!
e tene mente ancora chellu llutto
ca p’ ’a mamma ’a tre mise s’ha levato.
Ma è mezanotte: ’o padre copia ancora
nnanze ’a cannela ca poc’ato tene;
copia penzanno ’o figlio che sta fora;
chisà si ’o vede cchiù, chisà si vene!
Va pe’ nfonnere ’a penna e a primmo lanzo
sbaglia e l’acala ’a fora ’o calamaro.
Ah! dinto a chillu core che rumanzo!
che vita ’nfama e che mumento amaro!
E a chell’ora chi ’o vede a stu cupista?
sultanto ’a figlia ca nun ce se sparte:
— Papà tu sude? — No, mme tremma ’a vista
e ’na lacrema cade ncopp’ ’e ccarte!
