Chesta paggena è stata leggiuta du' vote e mo è fernuta.
— Ma st'Afreca, ched'è? — Giesummaria!
È ll'Afreca! Ched'è, nun 'o ssapite?
Comme fosse na Napule 'n Turchia...
È nu paese, teh! Nun me ndennite?
— Ma addò resta?... — Addò resta? Ncopp' 'a via
ca va all'Assabbia. — E 'a guerra, a chi 'a facite?
— A chi 'a facimmo? A tutt' 'a cumpagnia
de Rassalula... — E doppo, che n'avite?
— Niente. Facimmo 'a guerra pe fa 'a guerra!
Simmo suldate o no? Che ve penzate?
— Ma che ne vò, 'o Guverno, 'a chella terra?
— N'ha da vulè quaccosa, è naturale,
si no nun ce mannasse a sti suldate
p' 'e fa murì comm' a ttant'animale!
