Paggena:Lo cunto de li cunte - Tomo I.djvu/171

171

Jornata II

a lo passare, che ha voluto fare, s’è trenciato de manera, che, nanze che appila tanta pertosa, se le spilarrà ntutto lo tufolo de la vita. E, si be lo re ha fatto jettaro hanno co prommesse granne a chi lo sana, è spesa perza, ca se ne pò spizzolare li diente; e lo meglio, che pò fare, è tenere leste li lutto, ed apparecchiare l’assequia». Nella, sentenno la causa de lo male de lo prencepe, chiagnenno a selluzzo, disse fra se medesima: «Chi è stata st’arma mardetta, c'ha spezzato lo canale, pe dove passava lo pinto auciello mio, azzò s’aggia a spezzare lo connutto, pe dove passano li spirete mieje?» Ma, secotanno a parlare l’orca, stette zitto e mutto ad ausoliare. La quale deceva: «Ed è possibele, che è perduto lo munno pe sto povero signore?, e che non s’aggia da asciare lo remmedio a lo male sujo? Di a la medicina, che se nforna!; di a li miedeco, che se chiavano na capezza ncanna!; di a Galeno e Mesoè, che torneno li denare a lo mastro, mentre non sanno trovare recette a proposeto pe la salute de sto prencepe!» «Siente, vavosella mia — respose l’uerco — , «non so obrecate li miedece a trovare remmedie, che passeno li confine de la natura. Chessa non è coleca passara’, che noe jova no vagno d’uoglio; non è frato, che se cacce co sepposte de fico jejetelle, e cacazze de surece, non freve, che se ne vaga pe medecine e diete; né manco so ferute ordenarie, che nce voglia stoppata uoglio de pereconna. Perchè lo percanto, ch’era a lo vrito rutto, fa chillo effetto stisso, che fa lo zuco de le cepolle a lo fierro de la frezza, pe la quale se fa la chiaga