Paggena:Lo cunto de li cunte - Tomo I.djvu/181

181

Jornata II.

chine de campanelle, e, pò, lassa fare a nuje; ca lo volimmo pagare de bona moneta! Viola, desiderosa de la vennetta, se fece fare subeto subeto li chianielle dall’uerco. Ed, aspettato che lo cielo comm’a femmena Genovesa, se mettesse lo taffettà nigro ntuorno la facce, se ne jezero tutte quatto de conserva a la casa de lo prencepe. Dove le fate co Viola, senz’essere viste, trasettero drinto la cammara soja; e, comme lo prencepe accommenzaje ad appapagnare l’uocchie, le fate fecero no gran parapiglia, e Viola se mese a sbattere tanto li piede, ch’a lo remmore dele carcagna, e a lo fruscio de li campanelle, scetatose co no sorrejemiento granne lo prencepe, gridaje: mamma, mamma, ajutame! La quale cosa fatto doje tre vote, se la sfilare a la casa loro. Lo prencepe, dapò avere pigliato la matina agro de citro e sementella pe la paura, dette na passiata pe drinto lo giardino, non potenno stare no momento senza la vista de chella Viola, ch’era ntellegenza a li garuofane suoje. E, vedennola a bocca la porta, le disse: Bonni, bonni, Viola! E Viola: Bonni, figlio de lo re, io saccio chiù de te! E lo prencepe: tata, quanta pulece! Ed essa: mamma, mamma, ajutame! La quale cosa sentenno lo prencepe, disse: Me l’hai fatta, me l’hai calata!, io te cedo ed hai vinto! E, canoscenno veramente, ca sai chiù de me, io te voglio senz’antro pe mogliere. Cosi chiamato l’uerco, e cercatoncella, ca non voze mettere mano a le gregne d’antro, avenno saputo la matina stessa, ca era figlio de