CAGLIUSO
Trattenemiento quarto de la Jornata seconna.
Cagliuso, pe nustria de na gatta lassatole da lo patre, deventa signore; ma, mostrannosele sgrato, l’è renfacciata la sgratetudene soja.
Non se pò dire lo gusto granne, ch’appero tutte, de la bona fortuna de Viola, che, co lo nciegno sujo, se seppe fravecare cossi bona sciorte, a sfastio de le garge de le sore, die, nemiche de lo propio sango, le facevano tante cavallette pe farele rompere lo cuollo. Ma, essenno tiempo che Tolla pagasse lo cienzo, che doveva, sborzauno da la vocca le monete d’oro de le belle parole, cossi a lo debeto sujo sodesfece.
La ngratetudene, segnure, è chiuovo arroggiuto, che, mpezzato all’arvolo de la cortesia, lo fa seccare; è chiaveca rotta, che spogna li fonnamiente de la affrezzione; è folinea, che, cascanno drinto lo pignato de l’amecizia, le leva l’adoro e lo sapore; comme se vede e prova formalemente e ne vedarrite no designo abbozzato ne lo cunto, che ve diraggio.
Era na vota a la cettà de Napole mio no viecchio pezzente pezzente; lo quale era cossi nzenziglio, sbri- scio, grimmo, granne, lieggio, e senza na crespa ncrispo a lo crespano, che
