Paggena:Lo cunto de li cunte - Tomo I.djvu/184

184

Trattenimiento IV.

jeva nudo comme a lo peducchio. Lo quale, essenno a lo scotolare de li sacche de la vita, chiammaje Oraziello e Pippo, figlie suoje, decennole: Già so stato zitato sopra lo tenore de lo stromiento pe lo debeto, ch’aggio co la natura, e creditemo, se site cristiane ch’io senterria no gusto granne de scira da sto mantracchio d’affanne, da sto mantrullo de travaglie, si non fosse ca ve lasso scadute, granne comme a S. Chiara, a le cinco vie de Melito, e senza na maglia, niette comm’a bacile de varviero, liste comm’a sorgente, asciutto comm’uosso de pruno, che n’avite quanto porta mpede na mosca, e si corrite ciento miglia, non ve cade no picciolo. Pocca la sciorte mia m’ave arredutto, dove li tre cane cacano, che n’aggio la vita, e comme me vide, cossì me scrive , che sempre, comme sapite, aggio fatto alizze e cru- celle , e me so corcato senza cannela; co tutto chesto, voglio puro a la morte mia lassareve quarche signo d’ammore. Perzò, tu, Oraziello, che si lo primmogeneto mio, pigliate chillo crivo, che stace appiso a lo muro, co lo quale te puoi guadagnare lo pane; e tu, che si lo cacanitolo, pigliate la gatta, ed allecordateve de lo tata vuostro! Cossi decenno, scappajo a chiagnere, e, poco dapò, decette: A dio, ca è notte! Oraziello, fatto atterrare pe lemosina lo patre, pigliatose lo crivo, jette cernenno da ccà e da llà, pe abboscare la vita; tanto che, quanto chiù cerneva, chiù guadagnava. E Pippo, pigliata la gatta, disse: Gravide, che negra redetà m’ha lassata patremo!, che n’aggio da campare pe mene, e mo averraggio da fare le spese a dui! Che se n’ha vi-