Paggena:Lo cunto de li cunte - Tomo I.djvu/186

186

Trattenimiento IV.

quanno lo sole averrà dato fuoco a le restocchie de li campo dell’ajero, venerrà a fareve leverenzia. Cossi, venuto la matina, la gatta se ne jette da lo re, decennole: Segnore mio, lo segnore Cagliuso se manna a scusare si non vene, perchè sta notte se ne so fojute cierte cammariere, e no l’hanno lassato manco la cammisa! Lo re, sentenno chesto, subeto fece pigliare da la guardarobba soja na mano de vestite e de biancarie, e le mannaje a Cagliuso. E no passare doi ore, ch’isso venne mpalazzo, guidato da la gatta; dove appe da lo re mille compremiente, e, fattolo sedere a canto ad isso, le fece no banchetto da strasecolare. Ma, ntanto che se magnava, Cagliuso a bota a bota se votava a la gatta, dicendole: Mosce mia, sianote arrecommannate chelle quatto peruoglie, che non vagano a mala via! E la gatta responneva: Sta zitto, appila, non parlare de ste pezzentarie! E lo re, volenno sapere che l’accorreva, la gatta responneva, ca l’era venuto golio de no lemonciello piccolo. E lo re mannaje subeto a lo giardino a pigliarene no canestriello. E Cagliuso tornaje a la stessa museca de le zandraglie e pettole soje; e la gatta tornaje a dicere, ch’ammafarasse la vocca; e lo re domannaje de nuovo, che l’accorresse; e la gatta co n’autra scusa pronta, pe remmediare a la viltate de Cagliuso! All’utemo, manciate e chiacchiarato no piezzo de chesto e de chell’autro, Cagliuso cercaje lecenzia. E la gatta re- staje co lo re, descrevenno lo valore, lo nciegno, lo jodizio de Cagliuso, e, sopra tutto, la recchezza granne, che se trovava pe le campagne de Romma e