Paggena:Lo cunto de li cunte - Tomo I.djvu/193

193

Jornata II.

trovaje pe le strate. E, juto a lo parco, le semmenaje, comme aveva ditto lo serpe, che, nditto nfatto, sguigliaro, e fecero li troncune de le chiante, le frunne, li shiure, e li frutte tutte d’oro lampante, che lo re, vedenno tale cosa, jette n’estrece de stopore, e pampaniaje de prejezza. Ma, essenno mannato Cola Matteo da lo serpe a cercare a lo re la promessa: Adaso li cuorpe!, — disse lo re — , ca voglio n’autra cosa, si vole figliama! Ed è, che faccia tutte le mura, e lo suolo de lo parco de prete preziose. E, referuto sta cosa da lo parzonaro a lo serpo, isso le respose: Va crai matino, ed, adonanne tutto le graste, che truove pò la terra, jettale pe lo strato e pe le mura de lo parco, ca volimmo arrevare sto zuoppo! E Cola Matteo, comme la notte, ped avere fatto spalla a li mariuole, ave l’ausilio e va raccoglienno le sarcinole de li crepuscolo da lo cielo, pigliatose no cuofano sotta tetilleco, commenzaje a ire adunanno graste d’arciulo, piezze de tieste e do coperchiole, funne de pignate e de tiane, urie de scafareje, maneche de lancelle, lavre de cantaro, arresediannone quanto locernelle rotte, graste spezzate, fesine sesete, quante frantumme de roagne trovaje pe la via. E, fattone chello, che aveva ditto lo serpe, se vedde lo parco mautonato de smeraude e caucedonie, ntonacato de robino e carvunchie, che lo lostrore sequestrava la vista drinto li magazzeno dell’uocchie, e chiantava la maraveglia drinto a li territorio de li core. A lo quale spettacolo restajo lo re tutto de no piezzo, e non sapeva, che l’era socciesso! Ma, fattole dire n’autra vota lo ser-