Paggena:Lo cunto de li cunte - Tomo I.djvu/203

203

Jornata II.

piso: dall’urdene, che non commeneno, nasceno le resistenze, che non s’agghiustano; comm’appunto soccesse a lo re de Roccaspra, che, pe cercare na cosa ndebeta a la figlia, le deze causa de fuiresenne, a riseco de perdere lo nore e la vita. Ora dice, ch’era na vota lo re de Roccaspra, che aveva pe mogliere la mamma de la stessa bellezza; la quale, a la meglio carrera de l’anne, cascaje da lo cavallo de la sanetate, e se roppe la vita. Ma, nnante che se stotasse la cannela de la vita a lo ricanto dell’anne, se chiammaje lo marito, e le disse: Io saccio ca sempre m’aje amato svisciolatamente; perzò, mostrame a la fonnareglia de l’anne mieje, l’accoppatura de l’ammore tujo, promettennome de non te nzorare maje, se non truove n’auta femmena bella comme so stata io; autramente, te lasso na mardezzione a zizze spremmute, e te ne portarraggio odio pe nfi a l’auto munno! Lo re, che le voleva bene nfi ncoppa l’astraco, sentenno st’utema volontà, scappai a chiagnere, e, pe no piezzo, non potte responnere na parola mardetta. All’utemo, scomputo de trevoliare, le disse: Ch’io voglia sapere chiù de mogliere, nanze me schiaffa gotta, nanze me sia data lanzata catalana, nanze sia fatto comm’a Starace! Bene mio, scordatello, non credere a suonne, ch’io pozza mettere ammore ad autra femmena. Tu fuste la ncignatura de l’affezzione mia, tu te ne portarraje le stracce de lo boglie meje! Mentre isso diceva ste parole, la povera giovane, che faceva lo racano, strevellaje l’uocchie, e stennecchiaje li piede. Lo re, che vedde spilata Patria, spilaje le cannelle dell’uocchie, e fece