Paggena:Lo cunto de li cunte - Tomo I.djvu/205

205

Jornata II.

lo munno ve- nessero a la preta paragone de la bellezza, ca se voleva pigliare la chiù bella pe mogliere, e dotarela de no regno. La quale cosa essennose sparza pe tutto, non ce fu femmena a l’univerzo, che non venesse a tentare la sciorte soja; non ce restaje scerpia pe scorciata, che fosse, che non se mettesse ndozzana; perchè, comme se tocca sto tasto de la bellezza, non c’è gliannola, che se dia venta, non c’è orca marina, che ceda: ogneuna se picca, ogneuna ne vo la meglio; e, si lo sciecco le dice lo vero, ncorpa lo vrito, che non fa naturale, e l’argiento vivo, ch’è puosto a la sterza. Ora mo, essenno chiena la terra de femmene, lo re facennole mettere a filo se mese a passiare, comme fa lo gran Turco, quanno trase a lo serraglio, pe scegliere la meglio preta de Genoa pe affilare lo cortiello damaschino. E, jenno e venenno, da coppa a bascio, comm’a scigna, che mai abbenta, e schiudenno e squatranno chesta e chella, una le pareva storta de fronte, una longa de naso, chi larga de vocca, chi grossa de lavra, chesta longa ciavana, chella corta male cavata, chi troppo mbofonuta, chi sopierchio spepoliata: la Spagnola no le piaceva pe lo colore crepato; la Napoletana no le deva a lo more pe le stanfelle co le quale cammina; la Tedesca le pareva fredda e je lata; la Franzese, troppo cellevriello sbentato; la Veneziana, na conocchia de lino, co li capille cossi jancacce! All’utemo dell’utemo, chi pe na cosa, e chi pò n’autra, ne le mannaje tutte co na mano nante e n’autra dereto. E, vedenno ca tante belle facce erano resciute a garzetta, resoluto de stra-