e disse a la Regina: Mamma Gnora mia, si non dongo no vaso a st'Orza, mm'esce lo sciato. La Regina, che lo vedeva ascevolire, disse: Vafalo, vasa, bell'anemale mio, non me lo vedere speruto sto povero figlio: ed accostatase l'Orza, lo Prencepe, pigliatala a pezzechille, non se saziava de vasarela; e mentre stavano musso a musso, non saccio comme, scappaje lo spruoccolo da vocca a Preziosa, e rrestaje fra le braccia de lo Prencepe la cchiù bella cosa de lo munno; lo quale, stregnennola co le ttenaglie ammorose de le braccia, le disse; 'Ncappaste, sciurolo, non me scappe cchiù senza ragione veduta. Preziosa refonnenno lo colore de la vregogna a lo quatro de la bellezza naturale, le disse: Già songo a le mano toje; siate arrecommannato lo nnore mio, e spacca e pesa, e botame dove vuoje. E ddemannato da la Regina, chi fosse sta bella Giovane, e che cosa l’avesse arredotta a sta vita sarvateca; essa contaje pe lo filo tutta la storia de le desgrazie soje. Pe la quale cosa la Regina, laudannola de bona, e nnorata Fegliola, disse a lo Figlio, che se contentava, che le fosse stata mogliere. E lo Prencepe, che non desederava autra cosa a sta vita, le dette subeto la fede, ed essa, benedecennole 'ncocchia, fece sto bello 'ncrasto co ffeste e llommenarie granne. E Preziosa faceva scanaglio a la valanza de lo jodizio omano:
Che chi fa bene, sempre bene aspetta.
