Paggena:Lo cunto de li cunte - Tomo I.djvu/223

223

Jornata II.

sero spantecate a mirare sta bellezza cosa. La quale, co na voce pietosa pietosa, le disse: Aje ma- gnato cellevriello de gatta, o prencepe, che te si scordato, nditto nfatto, l’affrezzione de Filadoro? Cossì t’è sciuto de mammoria li servizio recevute, o scanoscente? Cossì paghe li beneficio, che t’ha fatto, o sgrato?, l’averete levato da le granfe dell’orca, l’averete dato la vita, e se stessa? E chesta è la gran merzè, che daje a chella sfortunata figliola de lo sbisciolato ammore, che t’ha mostrato? Di che se dia na vota, e levase; di che sponteche st’uosso, fi che vene l’arrusto! O negra chella femmena, che troppo sempre na de parole d’uommene, che portano sempre co le parole la sgratetudene, co li beneficie la scanoscenza, e co li debete lo scordamiento! Ecco la scura se magenava de fare la pizza driuto a lo Donato co tico, e mo se vede pazziare a sparte casatiello; credeva de fare co tico serra serra, e mo tu faje sarva sarva; ponzava de potere rompere no becchiero co tico, e mo ha rutto lo cantaro! Va, non te curare, facce de nega-debeto, ca te coglieno pe deritto le jastemme de tutto core, che te manna chella negrecata! Tu t’addonarraje quanto mporta mpapocchiare na peccerella, coffiare na figliola, nzavagliare na povera nocente, facennole sto bello trucco mucco, portannola folio a tergo, mentre te portava intus vero; mettennola sotta a la cedola, mentre te metteva sopra la capo; e, mentre essa te faceva tanta servetù, tenerela dove se faceno li serviziale! Ma, si lo cielo non s’ha posta la pezza all’uocchie, si li dei non s’hanno chiavato lo mafaro all’aurecchie, vederanno lo tuorto, che l’hai