casa te para fuoco!: ch’ogne uno ha li guai suoje, ogn’una sa, che porta sotto, ogn’uno sa, che le va pe lo stommaco: ca n’avimmo abbesuogno de ste ditte spallate , né d’accunte fallate, e de ste lanze spezzate! Chi se pò sarvare, se sarva; besogna smammarete da sta zizzenella! Auciello pierde-jornata, dessutele, mantrone, fatica, fatica!, miettete a l’arte, trovate patrone! Lo negrecato compare, sentennose fare sta parlata fore de li diente, sta sbottata de postemma, sta cardata senza pettenarulo; tutto friddo e jelato, comme a mariuolo trovato nfragante, comme a pellegrino, ch’ha sperduto la strata, comme a marinaro, rotta la varca, comme a pottana, ch’a perduto Taccunte, comme a peccerella, ch’ave allordato lo lietto, co la lengua nfra li diente, la capo vascia, la varva mpizzata mpietto, l’uocchie a pisciarielle, lo naso peruto li diente jelate, lo mano vacante, lo core assottigliato, la coda fra le coscio, cuoto cuoto’, zitto e mutto, se ne pigliaje le zaravottole, senza votarese mai capo dereto, venennole a sieste chella norata settenza:
Cane no mitato a nozze
Non ce vaa, ca coglie zotte.
Risero tanto de lo scuorno de lo sbregognato compare, che non s’adonavano ca lo sole, ped essere stato troppo prodeco de luce, era falluto lo banco; e, puosto le chiave d’oro sotto la porta, s’era misso nsarvo. Ma Cola Ambruoso e Marchionno, sciute co cosciale de cammuscio e casacche de saja frappata, a fare lo secunno motivo, scetarono l’aurecchie tutte a sentire lo spetaffio de st’egrogroga, che secota.
