LA TENTA
egroca
Cola Ambruoso e Marchionno.
Col. Fra tutte quante l’arte, Marchionno,
A la tenta se deve, comme disse,
Non saccio si fu guattaro, o si cuoco,
4Dare lo primmo vanto, e primmo luoco!
Mar. Io nego consequenza, Cola Ambruoso,
Perchè chessa arte lorda,
Ca vai co le manzolle
8Sempre de galla, vitrivuolo e alumma,
Comm’a petena justo de cargiumma.
Col. Anze, è la chiù polita
Fra tutte l’esercizie;
12Cosa de n’ommo appunto,
Che vo parere nietto, ed è sedunto.
Mar. Me darrai a rentennero,
Che sia de sprofformiero,
16de ragammatore?
Va, tornatenne, va, ch’hai fatto arrore!
Col. Io te voglio provare,
E mantenere drinto de no furno,
20Ca l’arte de tentore
È cosa de segnore.
Chesta, a lo juorno d’oje, s’usa fra tutte,
Co chesta l’ommo campa.
24Ed è tenuto ncunto;
Aggia mbroglie a lo cuorpo,
Aggia vizie a lo pietto,
Ca co la tenta copre ogne defletto.
