Paggena:Lo cunto de li cunte - Tomo I.djvu/247

247

Jornata II.

28Mar. Comme ne’ entra lo vizio de la vita,
     Co la tenta de lana e capisciola?
Col. Comme se vede ca non sai de cola
     Tu te cride ca parlo
     32De tegnere cauzette o pezze vecchie!
     La tenta, che dico io,
     E d’autra cosa, ch’inneco o verzino:
     Tenta, che fa parere a le perzone
     36Lo colore moriello ncarnascione.
Mar. Io sto drinto a no sacco,
     Non te ntenno spagliosca,
     Ca sto parlare tujo mpapocchia e nfosca!
40Col. Vi, ca, si tu me ntienne,
     Te mezzarai tentore,
     pure de canoscere chi tegne;
     Ed averrai gran gusto
     44Mparare st’arte nova, arte, che corre
     Fra le gente chiù scautra;
     Arte, che piglia a patto
     No scarafone, che te para gatto!
     48Siente, sarà na forca de tre cotte,
     Che scopa quanto matte, e quanto allumma,
     Che n’auza quanto vede,
     Ch’azzimma, quanto trova.
     52Ora chi sa sta tenta,
     No le dà nomme nfamme
     De latro marivuolo.
     De furbo marranchino,
     56Ma dirrà, ca se serve
     De lo jodizio, e caccia li donare
     Da sotta terra, abbusca, e saria buono
     A campare fi drinto de no vosco;
     60Che s’approveccia, ed è no buono fante,
     Saraco, tartarone e percacciuolo,
     Corzaro de copella.