E picciole e pennacchie
E frisole e fellusse,
Si ped essempie e prove tante e tante
Non è contento mai chi ha chiù contante?
Cic. Si tu pruove na vota sta vorpara,
Non te ne spise chiù, ch’è comm’a rogna,
Che quanto gratte chiù chiù da prodito.
Dammo na giravota
Pe l’arte e pe l’afficie de sto munno,
E vedarai ca se ne serve ogn’ommo.
Commenzammo da prima, ed antemonia,
Da chi tene vassalle:
Ecco abbista ed allumma no massaro
Che s’ha ’nchiuso li puorce,
Oie le cerca pe ’mpriesto tante scute
Da retornarencille
quanno po’ chiove passe e fico secche;
Craie manna pe tanto uorgio
Pe lo restituire a la recouta;
Mo le commanna l’aseno, o li vuoie,
Co titolo ca serve pe la corte;
E tanto durarà sto frusciamiento,
Tanto secotarà st’ammaro assedio
Che chillo, desperato,
Fa quarche ’ngioriata a lo vaglivo,
O le ioca de mano. Oh negrecato,
Che no l’avesse cacato la mamma,
Che s’avesse spezzato
La noce de lo cuollo! ecco, è pigliato
E schiaffato de pesole a na fossa,
Puosto cippe a li piede,
Misso fierre a lo cuollo
E manette a le mano
Co no spetaffio puosto a lo canciello:
Banno e commannamiento: olà, sfrattate!
Paggena:Lo cunto de li cunte - Tomo II.djvu/128
Chesta paggena nun è stata leggiuta.
120
LA VORPARA
