Chesta paggena è stata leggiuta du' vote e mo è fernuta.
miseria e nobiltà
Luis. E io pure, D.a Concè, perciò pe’ tutto dimane, vedimino de nce spartere, si no succede brutto! (pausa, di dentro suona di nuovo il campanello).
Pup. Mammà, 'a porta! (tutte e tre seggono). (Chisto po' essere che è D. Felice, nun lu voglio arapi) (alla madre).
Conc. (E io manco voglio ji arapì, pecchè si è chillo assassino de maritemo, comme stongo mò, le chiavo nu muorzo appena lu veco!) (altro squillo di campanello di dentro).
Luis. ’A porta nun la sentite?
Conc. E ched’è, nce stamine sole nuie dint’ a la casa?
Pup. Va arape tu.
Luis. Io nun voglio arapi, pecche po' essere che è lu marito vuosto, e io nun songo la serva soia!
Pup. Ma po' essere pure D. Felice?
Luis. E po’ essere pure pateto, chi ne sape niente?
Conc. Va arape tu, Pupe, nun mporta, va arape tu.
Pup. (Haie ragione che po’ essere papà, si no mo me muveva!) (via pel fondo; poi torna).
Conc. (Si è Pascale, aggio da fa revotà la casa!)
Luis. (Si è Felice, l'aggio da fa fernuta!)
Pup. (uscendo). D. Giacchino, lu patrone de casa.
Luis. Oh!
Conc. È arrivato a tiempo!
SCENA II.
D. Giacchino, e dette.
Giach. (esce fregandosi le mani). Buongiorno.
Conc. Buongiorno.
Giach. Come state, state bene?
