Chesta paggena è stata leggiuta du' vote e mo è fernuta.
miseria e nobiltà
mo passato lu guaio, e me parene mill'anne che passene sti quatto mise... Ne voglio fa miglia! Mamma mia, e che gente disperate e superbe!
Conc. Nuie vulimmo essere superbe, nun avimmo da dà cunto a nisciuno! Pe riguardo po ’a disperazione, vuie nun putire parlà..
Pup. Sempe cchiu disperate de nuie state!
Luis. Eh, avite ragione, che v'aggio da dicere? Me l’ aggio da piglià sulamente cu chillu sfurcato che m'ha miso a chesto. Ma va trova quà juorno de chiste, fernesce malamente dinto a sta casa!
Conc. Guè! D.a Luisè, tu senza che faje la guappa, fernesce malamente, e nun fernesce malamente, nuie nun simme fatte gente de miezo a la strata, che ghiammo truvanno de fa chiasso.... Zitto zitto te piglie la rrobicella toia, e te ne vaie, sà!
Luis. Me piglio la rrobicella e me ne vaco? D.a Concè, io credo che staie cu li pazzielle ncapo! Ve ne iate vuie, ma no nuie.
Pup. No, ve ne jate vuie, pecchè papà facette l'affitto, isso firmaie.
Luis. Neh? E lu patrone de casa pecchè nce la dette? Pecchè Feliciello facette lu garante... chillo piezzo de stupito! Intanto mò lu patrone de casa avanza cinche mesate, e voglio vedè chi li caccia sti denare. Isso ha da penzà primme a me spignà li pigne, e specialmente l’aniello cu li turchine che me lu mpignaie pe' ve fa magnà.
Conc. E io lu ssapeva che a chesto aveveme asci! L’aniello cu li turchine!.. Comme avesse ditto stu granne oggetto, n'anelluccio tutto strutto, che nun saccio quanto pesaie. Chillu povero mpignatore pe’
