Fel. (Po la faccia de mammeta!..) Me l’aggio vuluto sentere io sti quatte maleparole!
Viciè. Ma pecchè, Bettì?… Lu principe se credeva che m’ire? mugliera?
Bett. Già, perfettamente.
Viciè. Nonzignore, illustrissimo, io nun le songo niente. Bettina è na bona figliola, onesta e faticatora… Permettete? (fa per andar via) Lu patre de chillo guaglione è nu nfame!.. (via pel giardino).
Fel. (lo abbusco da chillo!..) Bettina mia, perdoname! Io ti giuro che da oggi in poi, vularraggio bene sulo a te… Nun te faccio piglià cchiu collera.
Bett. Va bene, starrammo a vedè.
Fel. E Peppeniello addò sta?… Me lu voglio abbraccià e bacià.
Bett. Mò nun po’ essere, pecchè chillo sta durmenno, te vede accustà vicino a lu lietto cu stu mustaccio, e po’ essere che se sceta, e lu faie mettere appaura.
Fel. No, io nun lu faccio scetà, lu vaso chianu chiano. Io lu voglio vedè a chillu povero criaturo!… (quasi piangendo).
Bett. Nun chiagnere, ca si’ brutto quanno chiagne… E ghiamme, ma zitto zitto!
Fel. (infilando il braccio di Bettina). Io ti ho voluto sempre bene.
Bett. E s’è visto!
Fel. So’ state la gente che hanno posto mpuzature, ma io aggio penzato sempe a te. (arrivano al primo uscio a sinistra). E mò avimmo fatto pace?
Bett. Gnorsì, avimmo fatto pace.
Fel. E ghiammo, jà! (vanno via).
