D.a Con. (Chisto che ntenzione tene, comne arremediammo!)
Lui. Lassate fà a me: a chisto lo mpapocchio io…
D.a Sav. (a Pul.) Dimme na cosa, è lo vero che lo compagno tujo ha fatto l’ammore sulo co la signora de la lettera?
Pul. Gnorsi, sulo co chella, e tanto che nce steva nganato, ogne notte nuje dormevemo nzieme, isso se suseva, pigliava lo ritratto sujo a folocrafia, lo vasava, e suspiranno diceva: Bella mia, io t’ho perduto pe sempe. Io aggio visto lo ritratto, non me piace, è chiatta chiatta, me pare na vallena, e chella bestia nce jeva tanto appriesso….
D.a Sav. Va statte zitto, ca sì no ciuccio…
Pul. (Lo vì ch’è essa!) Ma la vo bene assaje…
D.a Sav. (alle donne) Lo vedite ca me vo bene?
D.a Con. (E vuje mannatelo a sciogliere e spusatevillo.)
D.a Ang. (Nè, a proposito de sciogliere, chella povera Susanna sarrà morta).
D.a Sav. (Uh bene mio, nce n’eramo scurdate! D.a Sofì, jate abbascio, scioglietela, e senza dirle niente, portatela dinto a la cammera mia).
D.a Sof. (So lesta). (via nella grotta)
Pul. Nè, chille pecchò parlano sule? (a Luisella)
Lui. Stanno vedenno che puosto t’hanno da dà.
Pul. Me dessero no puosto da nzalataro, ca pure so contento.
D.a Sof. Madà, la vedite ccà, chesta non saccio si campa n’autra ora.
