D. Amalia. (ironica) Povera nnucente!
Rusella. Nnucente, sì! Fuie n’ommo ca me lusingaie e me ngannaie. E io ’o credette, pecchè, senza mamma e senza pate, ch’avevo ’a fa’?… Vene a di’ ca si, primma ’e ncuntrà stu scellerato, avesse ncuntrato a chill’angelo d’’o figlio vuosto, tutto chello ch’è succiesso nun sarrìa succeduto!…
D. Amalia. Ma tu avive ’a parlà, si ire na bona femmena: tu avive ’a cunfessà tutte cose a figliemo!
Rusella. E ’o potevo, forse?… Quanno po’ sapette ca Taniello aveva apierte l’uocchie a ’o figlio vuosto, me vedette perduta, nun sapeva a chi santo mm’arraccumanna; si cunfessavo, perdevo Aniello; si m’anniavo, iucavo na carta cu ’a speranza ’e vencere… E accussì facette: anniaie tutto.
D. Amalia. Ll’aie ’a chiagnere a lagrime ’e sanghe!…
Rusella. Cchiù ’e chello ch’aggio chiagnuto e sto’ chiagnenno?… Nun credo!… Io so’ nata sfurtunata ’a cuorpo a mammena!
D. Amalia. E te lagne?… Tu si’ stata ’a distruzione d’’a casa mia sana sana!…
Rusella. Io sto’ cca: facitene ’e me chello che vulite; ma nun mm’anniate ’o bene d’’o figlio vuosto, ch’aggio amato cchiù ’e l’uocchie mieie!.. Io l’aggio ’ngannato, è overo; ma è stato pe’ nun ’o perdere…
