SCENA II
Giuseppina — e detto.
Giuseppina — (con precauzioni). — Guè Federi?...
Federico — Giuseppina mia.
Giuseppina — Staie sulo?
Federico — Sulo.
Giuseppina — E accussi, che me dice?
Federico — E che te voglio dicere, la sorte nce vo nfelice a tutte e duje.
Giuseppina — Comme t avvilisce priesto, tu saje che te voglio bene.
Federico — Me vuò bene, è lo vero; ma che speranza è la nosta? Primme de tutto t obbligheranno a sposa sto cancaro de D. Felice, che è asciuto comme miercorì mmiezo a la semmana, e po ammesso anche che non nce stesse tutto cheste, te pare, mammeta te darria pe mogliera a me?
Giuseppina — E che fa, sì no buono giovene, tu tiene talento, e te può fa strada; circa a D. Felice po, chesto me l’aggio da vedè io.
SCENA III.
Angelarosa, Timoteo, Mariella, e detti.
Angelarosa — (D. d.) Io songo figlia di notaro, songo na signora e na letterata D. Timo.
Timoteo — (Di dentro). Ed io sono un gentiluomo e professore D.a Angelarò.
Federico — Vene mammeta e patrìeto.
Giuseppina — Mostrammo indifferenza. (Federico siede allo scrittoio e Giuseppina va alle finestra).
Angelarosa — (Fuori con Timoteo e Mariella). Non mi rispondete D. Timo.
Timoteo — E voi non m’insultate D.a Angelarò.
Angelarosa — Io vi ho portata una dote cospicua.
Timoteo — Ed io il mio dottorato.
Angelarosa — Vuje site no miedeco infelice de meza lira a la visita
Timoteo — E voi una cafona!
Angelarosa — Io cafona, io! A me questo insulto! Ah! ca te voglio...
