CANZONE NAPOLETANA
A CAGNA PEZZE O PASTORIELLO
A cagna pezze o pastoriello!
Nennè, mme siente… scinne mo ccà.
Da stammatina, io poveriello
Sto cammenanno senza fermà!
Nè, scinne a farme no zennariello;
A cagna pezze o pastoriello!
M’aggio acchiettato cierte ducate,
Cagnanno a pezze da ccà e da llà.
Ncopp’a sto core stann’astipate.
Tè pigliatille, t’i boglio dà.
Fatte na vesta, fatte n’aniello;
A cagna pezze o pastoriello!
Quanno vò essere sto bello juorno
Che nce potimmo, nennè, sposà!
Voglio lassare de ire attuorno,
Mme voglio l’ossa arreposà.
Quanno vò essere sto juorno bello!
A cagna pezze o pastoriello!
Nè, t’arrecuorde chella jornata
Che cagno a pezze voliste fa;
Ma po cagnannolo co na guardata,
Sto core mio t’avett’a dà.
E tu me diste lo tujo cchiù bello!
A cagna pezze o pastoriello!
